სამხრეთ ამერიკის ბლოკთან სავაჭრო შეთანხმება, რომელზეც მუშაობა 25 წელზე მეტი ხნის განმავლობაში მიმდინარეობდა, იანვარში ოფიციალურად გაფორმდა. მიუხედავად ამისა, ის სადავო რჩება, ბლოკის ისეთი წევრების მხრიდან, როგორიცაა საფრანგეთი, რომელიც კატეგორიულად ეწინააღმდეგება მას. ევროკომისია „მერკოსურთან“ სავაჭრო შეთანხმების დროებით გამოყენებას გააგრძელებს არგენტინასთან, ბრაზილიასთან, პარაგვაისა და ურუგვაისთან – განაცხადა პარასკევს ევროკომისიის პრეზიდენტმა ურსულა ფონ დერ ლაიენმა. ფონ დერ ლაიენის განცხადება მას შემდეგ გაკეთდა, რაც ურუგვაიმ და არგენტინამ ხუთშაბათს მოახდინეს შეთანხმების რატიფიცირება, რითაც გზა გაეხსნა მის დროებით ამოქმედებას. „ადრეც მითქვამს, როცა ისინი მზად იქნებიან, ჩვენც მზად ვართ“, - თქვა მან პარასკევს. ბრაზილიასა და პარაგვაის ჯერ არ აქვთ შეთანხმების რატიფიცირება, მაგრამ ფონ დერ ლაიენის თქმით, მოსალოდნელია, რომ ისინი მალე გააკეთებენ ამას. „მერკოსურის“ განხორციელებისკენ სწრაფვა იმ ფონზე ხდება, როდესაც აშშ-ის ტარიფები და ჩინეთის კონტროლი კრიტიკულ მინერალურ რესურსებზე, 27-წევრიან ევროკავშირს უბიძგებს, დადოს თავისუფალი ვაჭრობის შეთანხმებები მსოფლიოს სხვა ქვეყნებთან. ევროკომისიის ეს ნაბიჯი ევროკავშირის, ურუგვაისა და არგენტინის კომპანიებს საშუალებას აძლევს, ისარგებლონ ახალი საბაჟო წესებითა და სხვა შეღავათებით, სანამ შეთანხმება ოფიციალურად ამოქმედდება. 25-წლიანი მოლაპარაკებების შემდეგ, „მერკოსურის“ შეთანხმება პარაგვაიში 17 იანვარს გაფორმდა, რომლის მიზანია 700 მილიონზე მეტი ადამიანის თავისუფალი სავაჭრო ზონის შექმნა. 21 იანვარს, ევროპარლამენტმა მცირე უპირატესობით გადაწყვიტა, შეთანხმება საბოლოო კენჭისყრამდე გადაეგზავნა ევროპის მართლმსაჯულების სასამართლოში (ECJ) განსახილველად, რითაც შეთანხმების განხორციელება გადაიდო. პარასკევს, კომისიის პრეზიდენტმა განაცხადა: „დროებითი გამოყენება თავისი ბუნებით დროებითია. შეთანხმება სრულად დასრულდება მხოლოდ მას შემდეგ, რაც ევროპარლამენტი თანხმობას გასცემს“. ფონ დერ ლაიენი არსებითად გვერდს უვლის კანონმდებლებს, სანამ შეთანხმება სრულ ძალაში შევა – ეს ნაბიჯი სავარაუდოდ კრიტიკას გამოიწვევს. „ჩვენი ბიზნესები, ჩვენი მუშები და ჩვენი მოქალაქეები მოიმკიან სარგებელს და მათ ეს სარგებელი რაც შეიძლება მალე უნდა მიიღონ“, - დასძინა მან. „ეს ეხება მდგრადობას, ეს ეხება ზრდას და ევროპის მიერ საკუთარი მომავლის ფორმირებას“. მან განცხადების გაკეთების შემდეგ კითხვებზე პასუხები არ გასცა. „მერკოსურის“ შეთანხმებამ ფერმერებისა და გარემოს დამცველების მწვავე წინააღმდეგობა გამოიწვია. ევროპელი ფერმერები აცხადებენ, რომ იაფი იმპორტის გამო ბაზრებიდან გამოიდევნებიან. საფრანგეთი, ევროკავშირის უმსხვილესი სოფლის მეურნეობის მწარმოებელი, ხელმძღვანელობდა შეთანხმების წინააღმდეგობას და წარუმატებლად სცადა მისი დაბლოკვა. ფონ დერ ლაიენის განცხადებაზე რეაგირებისას, ფრანგმა ევროპარლამენტარმა სელინ იმარტმა კომისია დაადანაშაულა ფერმერების „უპატივცემულობაში“. „კომისია დამღუპველ სიგნალს უგზავნის ჩვენს ფერმერებს, რომლებიც უკვე ისედაც იბრძვიან და კიდევ უფრო ზრდის უნდობლობას ევროკავშირის მიმართ“, - განუცხადა მან ფრანგულ საინფორმაციო სააგენტო AFP-ს. საფრანგეთის პრეზიდენტმა ემანუელ მაკრონმა ასევე გააკრიტიკა ფონ დერ ლაიენის განცხადება. „საფრანგეთისთვის ეს სიურპრიზი, ცუდი სიურპრიზია, ევროპარლამენტისთვის კი უპატივცემულობაა“, - განუცხადა მაკრონმა ჟურნალისტებს პარასკევს. გარემოს დამცველები შიშობენ, რომ ევროკავშირის გაზრდილი მოთხოვნა „მერკოსურის“ სასოფლო-სამეურნეო პროდუქტებზე შესაძლოა სამხრეთ ამერიკაში ტყეების გაჩეხვის ზრდას შეუწყოს ხელი. შეთანხმების მოწინააღმდეგეები ასევე აცხადებენ, რომ ის ისეა ჩამოყალიბებული, რომ მომავალი სავაჭრო შეთანხმებების მიღება ევროკავშირის წევრი სახელმწიფოების კონსენსუსის გარეშეც იქნება შესაძლებელი. შეთანხმების მხარდამჭერები ხედავენ შესაძლებლობებს საავტომობილო სექტორისთვის, მანქანათმშენებლობისთვის და ფარმაცევტული ინდუსტრიისთვის მსოფლიოს ერთ-ერთ უმსხვილეს თავისუფალი ვაჭრობის ზონაში. გერმანიის საგარეო საქმეთა მინისტრმა იოჰან ვადეპულმა, რომელსაც დიდი საავტომობილო ინდუსტრია აქვს, შეთანხმებას „ისტორიული“ უწოდა. „გერმანია დაუღალავად იმუშავებს ამ ისტორიული შეთანხმების სრული პოტენციალის გამოსაყენებლად“, - დაწერა მან სოციალურ ქსელში.