ვაშინგტონში, აშშ-ის კონგრესის შენობის – კაპიტოლიუმისკენ შეიარაღებული სირბილის დროს, პოლიციამ 18 წლის მამაკაცი დააკავა. სამართალდამცველების განცხადებით, ეჭვმიტანილი, რომელიც იდენტიფიცირებულია, როგორც კარტერ კამაჩო (Carter Camacho) სმირნადან, ჯორჯიის შტატი, ატარებდა ტაქტიკურ ჟილეტს და ხელთათმანებს, დატენილ თოფთან ერთად მას დამატებითი საბრძოლო მასალაც ჰქონდა. აშშ-ის კაპიტოლიუმის პოლიციის უფროსის, მაიკლ სალივანის თქმით, ეჭვმიტანილმა კაპიტოლიუმის შენობისკენ „რამდენიმე ასეული მეტრი“ ირბინა, საბრძოლო სტილის თოფი ეჭირა, სანამ პოლიცია მას შეაჩერებდა. ოფიცრებმა ეჭვმიტანილს მოუწოდეს, იარაღი დაეგდო. ის დაემორჩილა ბრძანებას, დაწვა მიწაზე და დააკავეს, – აცხადებს პოლიცია. პოლიციას მოტივი არ გაუსაჯაროებია და აღნიშნა, რომ ეჭვმიტანილის ქმედებები გამოძიების საგანია, მათ შორის იკვლევენ, აპირებდა თუ არა ის კონგრესზე თავდასხმას, რომელიც ამჟამად სესიაზე არ არის. „ვინ იცის, რა მოხდებოდა, აქ ოფიცრები რომ არ მდგარიყვნენ?“ – განაცხადა სალივანმა პრესკონფერენციაზე. მოგვიანებით პოლიციამ ეჭვმიტანილის „მერსედესის“ მარკის ჯიპი აშშ-ის ბოტანიკური ბაღის წინ, ახლომდებარე მერილენდის გამზირზე იპოვა. მანქანაში აღმოჩენილია გაზის ნიღაბი და კევლარის ჩაფხუტი. სალივანმა ჟურნალისტებს განუცხადა, რომ ეჭვმიტანილი ხელისუფლებისთვის უცნობი იყო. „მანქანა მასზე არ იყო რეგისტრირებული და მას რამდენიმე მისამართი აქვს“, – დასძინა მან. აშშ-ის კაპიტოლიუმის პოლიციამ განცხადებაში აღნიშნა, რომ ეჭვმიტანილს ბრალი ედება უკანონო ქმედებებში, ასევე ლიცენზიის გარეშე შაშხანის ტარებაში, არარეგისტრირებული ცეცხლსასროლი იარაღის და არარეგისტრირებული საბრძოლო მასალის ფლობაში. სამშაბათის დაკავება მოხდა ერთი კვირით ადრე, სანამ აშშ-ის პრეზიდენტი დონალდ ტრამპი კონგრესს „ერის მდგომარეობის შესახებ“ ყოველწლიური მოხსენებით მიმართავდა. პოლიციის განცხადებით, ინციდენტი არ შეცვლის ღონისძიებისთვის უსაფრთხოების მზადებას. „ჩვენ ძალიან, ძალიან სერიოზულად ვეკიდებით „ერის მდგომარეობის შესახებ“ მოხსენებას“, – განაცხადა პოლიციის უფროსმა სალივანმა.