აშშ-ის ყოფილმა ელჩმა საქართველოში, იან კელიმ კომენტარი გააკეთა ვიცე-პრეზიდენტ ჯ.დ. ვენსის სამხრეთ კავკასიაში ვიზიტზე, რომლის ფარგლებშიც საქართველოში გაჩერება არ ყოფილა. კელიმ განაცხადა, რომ ვიცე-პრეზიდენტის გადაწყვეტილებაში, არ გამგზავრებულიყო თბილისში, არაფერი იყო გასაკვირი. მან განმარტა, რომ აშშ კვლავ მიიჩნევს სამხრეთ გაზის კორიდორს მნიშვნელოვნად აღმოსავლეთსა და დასავლეთს შორის ვაჭრობისთვის, მაგრამ არა საქართველოს გავლით. ჯ.დ. ვენსის ტურნე სამხრეთ კავკასიაში 9 თებერვალს დაიწყო. აშშ-ის ვიცე-პრეზიდენტი თავდაპირველად სომხეთში გაემგზავრა ოფიციალური ვიზიტით მეუღლესთან, უშა ვენსთან და შვილებთან ერთად. 10 თებერვალს, მან აზერბაიჯანში გადაინაცვლა. ვენსი არის აშშ-ის ყველაზე მაღალი რანგის ოფიციალური პირი, რომელმაც ოდესმე სომხეთი მოინახულა. წინა ვიზიტი ამერიკელი მაღალჩინოსნის მიერ 2022 წლის სექტემბერში შედგა, როდესაც მაშინდელი წარმომადგენელთა პალატის სპიკერი ნენსი პელოსი ეწვია ქვეყანას. იან კელი: „ერთმა ქართველმა ჟურნალისტმა მკითხა, რატომ არ ეწვია ვიცე-პრეზიდენტი ვენსი თბილისს ბოლო ვიზიტის დროს. ჩემი პასუხი ასეთი იყო: „ქართული ოცნების“ მთავრობამ დასავლეთისგან ზურგი შეაქცია. ტრამპის პირველი პრეზიდენტობის დროს, სახელმწიფო მდივანი პომპეო მოუწოდებდა თბილისს, გაეგრძელებინა ანაკლიის ღრმაწყლოვანი პორტის მშენებლობა დასავლურ კონსორციუმთან პარტნიორობით, აღნიშნავდა რა, რომ ჩინეთს „არ ადარდებს საქართველოს ინტერესები“. რა გააკეთა თბილისმა? მან გააუქმა დასავლური კონტრაქტი და გადასცა კონსორციუმს, რომელშიც ჩინური მხარეც იყო. პრემიერ-მინისტრმა კობახიძემაც ხელი მოაწერა ჩინეთთან სტრატეგიული პარტნიორობის შეთანხმებას, ამავდროულად უწოდა შეერთებულ შტატებს „გლობალური ომის მხარდამჭერები“, ხოლო ჩინეთს „მშვიდობისა და პროგრესის მოდელი“. გია ნოდია: „„ქართული ოცნების“ ფსონი რუსეთზე მცდარი აღმოჩნდა“ „ეს არ არის საგარეო პოლიტიკის ცვლილების ერთადერთი მაგალითი. მთავრობამ ასევე დაიწყო კავშირების დამყარება ირანთან. კობახიძე და სხვა ოფიციალური პირები ეწვივნენ თეირანს, და ქართველმა წარმომადგენლებმა ხელი მოაწერეს სამძიმრის წიგნს იმ მსხვერპლთათვის, რაც აღიწერა, როგორც „ამერიკული აგრესია“. გასაკვირი არ არის, რომ ვიცე-პრეზიდენტმა თავიდან აიცილა თბილისი. აშშ კვლავ მიიჩნევს სამხრეთ კორიდორს მნიშვნელოვნად აღმოსავლეთსა და დასავლეთს შორის ვაჭრობისთვის, მაგრამ არა თბილისის გავლით. საქართველოს მთავრობა აღარ არის ვაშინგტონის სანდო პარტნიორი. „ქართულმა ოცნებამ“ გააკეთა არჩევანი და ახლა მას მოუწევს შედეგების წინაშე დგომა.“ პუბლიკაციებში გამოყენებული ტოპონიმები და ტერმინოლოგია, ისევე როგორც მათში მოცემული შეხედულებები, მოსაზრებები და სტრატეგიები, სულაც არ ასახავს JAMnews-ის ან მისი რომელიმე თანამშრომლის შეხედულებებსა და მოსაზრებებს. JAMnews იტოვებს უფლებას წაშალოს კომენტარები, რომლებსაც მიიჩნევს შეურაცხმყოფელად ან სხვაგვარად მიუღებლად. © JAMnews 2025 - ყველა უფლება დაცულია