მოწმეების და ადგილობრივი პოლიციის ინფორმაციით, მოტოციკლეტებზე ამხედრებულმა შეიარაღებულმა პირებმა ნიგერიის ჩრდილოეთ ნაწილში სამი სოფელი დაარბიეს, რა დროსაც სულ მცირე 32 ადამიანი მოკლეს და რამდენიმე გაიტაცეს. შაბათს ნიგერის შტატის ბორგუს რაიონში განხორციელებული თავდასხმები ჩრდილოეთ ნიგერიაში არსებული უსაფრთხოების რთული კრიზისის ფონზე მოხდა, რომელიც ISIL-თან (ISIS) დაკავშირებულ შეიარაღებულ ჯგუფებს, ასევე გამოსასყიდის მიზნით ადამიანების გამტაცებელ ბანდებს მოიცავს. ნიგერის შტატის პოლიციის წარმომადგენელმა, ვასიუ აბიოდუნმა, ერთ-ერთ სოფელზე თავდასხმა დაადასტურა. „სავარაუდო ბანდიტები შეიჭრნენ სოფელ ტუნგა-მაკერიში“, – განაცხადა მან. „ექვსმა ადამიანმა სიცოცხლე დაკარგა, ასევე გადაწვეს რამდენიმე სახლი, ხოლო ჯერ დაუდგენელი რაოდენობის ადამიანი გაიტაცეს“. მან დაამატა, რომ თავდამსხმელები სოფელ კონკოსოში გადავიდნენ, ხოლო სხვა თავდასხმების დეტალები გაურკვეველი რჩება. ჯერემი ტიმოთიმ, კონკოსოს მცხოვრებმა, საინფორმაციო სააგენტო Reuters-ს განუცხადა, რომ მის სოფელზე თავდასხმა გამთენიისას, სპორადული სროლით დაიწყო. „სულ მცირე 26 ადამიანი დაიღუპა სოფელში მას შემდეგ, რაც მათ პოლიციის განყოფილება გადაწვეს“, – თქვა ტიმოთიმ და დასძინა, რომ თავდამსხმელები კონკოსოში დაახლოებით დილის 6 საათზე (05:00 GMT) შევიდნენ და უმისამართოდ ისროდნენ. მისი თქმით, მაცხოვრებლებს სამხედრო თვითმფრინავების ხმა ესმოდათ. კონკოსოს კიდევ ერთმა მცხოვრებმა, აბდულაჰი ადამუმ, განაცხადა, რომ 26 ადამიანი მოკლეს. „ისინი თავისუფლად მოქმედებდნენ ყოველგვარი უსაფრთხოების ძალების გარეშე“, – განუცხადა მან Associated Press-ის საინფორმაციო სააგენტოს. საინფორმაციო სააგენტო AFP-მ, უსახელო ჰუმანიტარულ წყაროზე დაყრდნობით, კონკოსოში დაღუპულთა რიცხვი 38-ად შეაფასა. წყაროს თქმით, მსხვერპლი ცეცხლსასროლი იარაღით მოკლეს ან ყელი გამოჭრეს. სოფელში სახლების უმეტესობა დაიწვა და გარდა უკვე დათვლილი გარდაცვლილებისა, „სხვა ცხედრებიც არის აღმოჩენილი“, – განუცხადა წყარომ AFP-ს. სააგენტომ კონკოსოს მცხოვრების სიტყვები მოიყვანა, რომლის მიხედვითაც შეიარაღებულმა პირებმა მისი ძმისშვილი მოკლეს და ოთხი ქალი გაიტაცეს. „კონკოსოს შემდეგ ისინი წავიდნენ პისაში, სადაც პოლიციის განყოფილება გადაწვეს და ერთი ადამიანი მოკლეს.“ „ამჟამად მრავალი ადამიანი დაკარგულია“, – განაცხადა მან. AP-მ ასევე გაავრცელა ინფორმაცია პისაში თავდასხმის შესახებ, დეტალების მოწოდების გარეშე. ნიგერის შტატში განხორციელებულ თავდასხმებს წინ უძღოდა ამ თვის დასაწყისში შეიარაღებული მებრძოლების სასიკვდილო თავდასხმა მეზობელ კვარასა და კაცინას შტატებში, რის შედეგადაც თითქმის 200 ადამიანი დაიღუპა. ნიგერისა და კვარას შტატების საზღვარზე მდებარეობს კაინჯის ტყე, რომელიც ცნობილი თავშესაფარია ბანდიტებისა და მებრძოლებისთვის, მათ შორის შეიარაღებული ჯგუფ „ბოკო ჰარამის“ წევრებისთვის. გასული წლის ოქტომბერში, ალ-ქაიდასთან დაკავშირებულმა ჯგუფმა ისლამისა და მუსლიმების მხარდაჭერისთვის (JNIM) ასევე აიღო პასუხისმგებლობა ნიგერიის მიწაზე თავის პირველ თავდასხმაზე, ვოროს მახლობლად, კვარას შტატში. ნიგერის შტატის ბორგუს რაიონის რელიგიურმა და საზოგადოებრივმა ლიდერებმა გასულ კვირას მოუწოდეს პრეზიდენტ ბოლა ტინუბუს, შექმნას სამხედრო ბაზა რეგიონში, რათა ბოლო მოეღოს განმეორებად თავდასხმებს, იტყობინება ნიგერიის მედია. ნიგერია ასევე ზეწოლის ქვეშაა უსაფრთხოების აღსადგენად მას შემდეგ, რაც შეერთებული შტატების პრეზიდენტმა დონალდ ტრამპმა გასულ წელს ის ქრისტიანების დაუცველობაში დაადანაშაულა. ხელისუფლებამ, თუმცა, უარყო, რომ ქრისტიანთა სისტემატური დევნა ხდება, ხოლო დამოუკიდებელი ექსპერტები აცხადებენ, რომ ნიგერიის უსაფრთხოების კრიზისები კლავს როგორც ქრისტიანებს, ასევე მუსლიმებს, ხშირად ყოველგვარი განსხვავების გარეშე. ამასობაში, ნიგერიის მთავრობამ ვაშინგტონთან თანამშრომლობა გააძლიერა უსაფრთხოების გასაუმჯობესებლად, ხოლო დეკემბერში აშშ-ის სამხედროებმა საჰაერო იერიშები განახორციელეს სოკოტოს შტატში, მიზნად ისახავდნენ რა, როგორც ვაშინგტონი აცხადებს, შეიარაღებულ მებრძოლებს.