შეერთებული შტატების ჩრდილო-აღმოსავლეთში ძლიერი ზამთრის ქარიშხალი მძვინვარებს. რეგიონის დიდ ნაწილში მოქმედებს გადაადგილების აკრძალვები, რადგან მოსახლეობა ქარბუქისთვის ემზადება. კვირა საღამოს, როდესაც ძლიერმა თოვლმა შეერთებული შტატების ჩრდილო-აღმოსავლეთი მოიცვა, ნიუ-იორკისა და ნიუ-ჯერსის მაცხოვრებლები სახლებში დარჩნენ, რასაც გადაადგილების აკრძალვა მოჰყვა. ქარბუქის გაფრთხილებები გაიცა ნიუ-იორკზე, ლონგ-აილენდზე, ბოსტონზე და დელავერის, მერილენდის, ნიუ-ჯერსის, კონექტიკუტის, როდ-აილენდისა და მასაჩუსეტსის სანაპირო ზონებზე. საგანგებო მდგომარეობა გამოცხადდა ნიუ-იორკის შტატში, ნიუ-ჯერსიში, დელავერში, როდ-აილენდში, კონექტიკუტსა და მასაჩუსეტსში. ამინდის ეროვნული სამსახურის (NWS) განცხადებით, ქარბუქი „სწრაფად მოედება“ მერილენდიდან სამხრეთ-აღმოსავლეთ ნიუ-ინგლანდამდე, რაც გადაადგილებას „უკიდურესად სახიფათოს“ გახდის. ასევე, აღინიშნა, რომ ბევრ რაიონში მოსალოდნელია 30-დან 60 სანტიმეტრამდე თოვლი, რასაც ძლიერი ქარი მოჰყვება. NWS-ის ცნობით, ქარიშხლის გზაზე დაახლოებით 54 მილიონი ადამიანი იმყოფება, ხოლო რეგიონის ოფიციალურმა პირებმა მოსახლეობას მოუწოდეს, თავი შეიკავონ გადაადგილებისგან. ამასთან, ამინდის სამსახურის განცხადებით, ბევრ რაიონში ხილვადობა 400 მეტრი ან ნაკლები იქნება. ქარიშხალი ნიუ-იორკს კვირა საღამოს დაატყდა თავს. გაუარესებული ხილვადობის გამო, უოლ-სტრიტის ცათამბჯენები ბრუკლინის ახლომდებარე რაიონიდან თითქმის არ ჩანდა. მერმა ზოჰრან მამდანმა აკრძალა გადაადგილება ყველა ქუჩაზე, გარდა გადაუდებელი შემთხვევებისა, კვირა საღამოს 9 საათიდან (აღმოსავლეთ დროით) ორშაბათის შუადღემდე. „ნიუ-იორკს ბოლო ათი წლის განმავლობაში ასეთი მასშტაბის ქარიშხალი არ უნახავს“, - განაცხადა მან. გავრცელებული ინფორმაციით, სოციალური მუშაკები უსახლკარო ნიუ-იორკელებს მოუწოდებდნენ თავშესაფრებსა და გამათბობელ ცენტრებში გადასულიყვნენ. კვირას ქვეყნის მასშტაბით ათასობით ფრენა გაუქმდა, ათასობით კი გადაიდო, იტყობინება თრექინგის ვებგვერდი FlightAware. ნიუ-იორკის ბროდვეის თეატრალური წარმოდგენები გაუქმდა, ხოლო ორშაბათს სკოლები, მუნიციპალური ბიბლიოთეკები და სხვა დაწესებულებები დაიხურა. ნიუ-ჯერსიში გუბერნატორმა მიკი შერილმა კვირა შუადღიდან საგანგებო მდგომარეობა გამოაცხადა, რამაც თანხების გათავისუფლება და რესურსების განლაგება შესაძლებელი გახადა ამინდის კრიზისის მოსაგვარებლად. „ჩვენ ველოდებით ქარბუქს, ძლიერ თოვლს და ძლიერ ქარს მთელი შტატის მასშტაბით, ასევე სანაპირო დატბორვას“, - დაწერა მან X-ზე. ბოსტონმა საჯარო სკოლები და მუნიციპალური შენობები ორშაბათს დახურა. „ჩვენ ყველას ვთხოვთ, წინასწარ დაგეგმონ, დარჩნენ უსაფრთხოდ და თბილად, და თავი შეიკავონ გზებზე გასვლისგან, რათა დაგვეხმარონ საზოგადოებრივი სამუშაოებისა და საზოგადოებრივი უსაფრთხოების ძალისხმევაში“, - განაცხადა ქალაქის მერმა მიშელ ვუმ. სინოპტიკოსები ასევე აფრთხილებდნენ ელექტროენერგიის გათიშვის შესახებ ძლიერი თოვლისა და ქარის გამო. თრექინგის ვებგვერდის poweroutage.us-ის თანახმად, ნიუ-ჯერსის შტატში 22 895 მომხმარებელს არ მიეწოდებოდა ელექტროენერგია აღმოსავლეთ დროით 19:30 საათისთვის (ცენტრალური ევროპის დროით 13:30 საათი).