ესპანეთის ჩრდილო-აღმოსავლეთ კატალონიის რეგიონში ხუთსართულიან საცხოვრებელ კორპუსში გაჩენილ ხანძარს სულ მცირე ხუთი ახალგაზრდა ემსხვერპლა, ხუთმა კი მსუბუქი დაზიანებები მიიღო, – ამის შესახებ სამშაბათს სახანძრო სამსახურმა განაცხადა. სახანძრო სამსახურის განცხადებით, ცეცხლი ორშაბათს საღამოს გაჩნდა მანლიეუში, ბარსელონადან დაახლოებით 80 კილომეტრის (50 მილი) ჩრდილოეთით მდებარე ქალაქში, ხუთსართულიანი შენობის ბოლო სართულზე, სათავსოში. ხანძრის გამომწვევი მიზეზი ჯერ დაუდგენელია და ოფიციალური პირები საქმის მოკვლევას აწარმოებენ. პოლიციის განცხადებით, დაღუპული ხუთივე ადამიანი კორპუსში არ ცხოვრობდა. სახანძრო სამსახურში ზარი მას შემდეგ შევიდა, რაც რამდენიმე მაცხოვრებელმა შენობის ბოლო სართულზე ხანძრისა და კიბის უჯრედში კვამლის შესახებ შეატყობინა. ადგილზე მისულ მეხანძრეებს შენობა მთლიანად ევაკუირებული დახვდათ. ხანძრის ჩაქრობის შემდეგ, მეხანძრეებმა პირველი მსხვერპლი აღმოაჩინეს, რომელსაც გულის შეტევა განუვითარდა. მეხანძრეებმა ძებნა დააჩქარეს და სათავსოში კიდევ ოთხი ცხედარი იპოვეს. მათი ასაკი ჯერ დადგენილი არ არის, რადგან სრულ იდენტიფიკაციას ელოდებიან. თუმცა, ესპანური საინფორმაციო სააგენტო EFE-ს წყაროების თანახმად, დადასტურებულია, რომ ისინი ყველა ახალგაზრდა იყვნენ, ზოგიერთი მათგანი კი შესაძლოა არასრულწლოვანიც ყოფილიყო. „უცნობი მიზეზების გამო, შიგნით მყოფმა ადამიანებმა სათავსოდან გამოსვლა ვერ შეძლეს“, – განაცხადა სახანძრო სამსახურმა. მიუხედავად მეხანძრეებისა და სასწრაფო დახმარების ჩარევისა, „მათი სიცოცხლის გადასარჩენად არაფერი გაკეთდა“, – დასძინეს მათ.